太后之羽絨祭

我家一年一度既盛事, 我仲以為今年無人被太后"欽點"做呢件吃力不討好既苦差! 原來今年輪到三少。舊年係我, 前年係靚女珍同我, 再之前係大少同大少奶。

每年冬天, 唔凍係唔會發生。只不過, 如果天氣一凍, 就大件事! 我經常講:「如果錢可以解決到既話, 我唔介意, 當破財擋災。 」太后唔係咁易耍得掂, 每年都嗌救命話自己冇衫著:「如果有件羽絨就好啦!」

由於太后既要求好....XYZ**##刁鑽, 大家領過野既都怕左, 敬而遠之! 另外, 大家都要返工, 叫佢自己買, 然後比返錢佢, 佢只會答:「我唔識買。」所以只好係百忙中抽時間陪佢做呢件事。其實陪佢買野係一d都唔過份既事, 但係佢係一d都唔appreciate你為左佢付出既精神同時間, 錢仲係次要。

太后既要求:
你買埋返黎比佢, banned硬, 鍾意自己揀。基本要求係 - 個label一定要係XL, 唔使里係咪真係加大。唔可以係男裝, 最好紅色, 但係紅得黎唔可以咁搶。羽絨成份如果係70%都會被睇唔起, 著起之後, 唔可以有些少拱起。簡單d講, 係著起後, 唔可以遮擋到佢既魔鬼濕柴。跟住到牌子, 真正名牌, 佢唔識, 但係又睇唔起一d本地平靚正大牌子。仲有係好介意個價錢.......唔夠照!

計下計下, 其實佢玩左咁多年, 我都數得出佢至少有4件羽絨, 但係從來未見過佢著。三少話今年玩完一大輪, 最後係無買到。

出年輪到邊個好呢?

俏皮女收銀

幾個月前, 阿ball講過一個關於APM女收銀既笑話。 如果未睇, 請去阿ball個blog重溫"小心說話！"。
http://cxballball.blogspot.com/2005_11_01_cxballball_archive.html

上星期, 同靚女珍去旺角新世紀間大家鑊, 又發生左類似故事。
女收銀:「先生, 你lun(lunch唔要ch音)走定係度食?」
我差d忍唔住笑左出黎, 因為我即刻將兩件事連埋一齊........

初二開年記

都係去左三少屋企, 食完開年飯後, 唔少得既係魚蝦蟹局。

之後, 黎左我屋企。大家都玩左按摩機器。由於事出突然, 我地到最後叫pizza做晚餐。

戲玉.......少女的秘密.......開山劈石, 由阿妹擔正, 請睇:
http://hk.pg.photos.yahoo.com/ph/littlesunn2006/my_photos

唔好意思! 快樂總係要建築係別人身上, 阿妹, 你每滴眼淚都唔係白流既, 我地真係笑得好開心!

恭喜發財

恭喜發財! 年初一, 真真正正休息的一日。

年廿七晚先返到香港, 所以只有兩日時間做埋剩底既新年準備。由於街頭實在有太多吸引人既事物, 屋企d工夫, 算吧! 一於shortcut......

我自己盆年花, 終於係年初一既凌晨砌好, 睇下上面.......

年廿九晚, 諗住出街買定送, 等今日可以唔洗出街同人迫。點知PSM同小春春竟然call我行花市! 實力太好啦! 好感激你地經常掛住我! Friend即係friend. 由於花市太多人同落雨, 我地hea左一陣之後就散band啦! 之後, 我就去買定今日既煲湯料, 亦因為咁, 所以今日真係好relax呀! 正!

聽日, 一切回復正常.......因為要開年呀! 又要大戰啦!

無題的一天

完全同今日的事無關係, 只係諗唔到個subject。

錢氏伉儷今日駕臨寒舍, 等你地黎好耐啦! 之前, 我同ball約左今日玩煮飯仔。由於擒日全區更新水力設施, 我返到屋企先發覺d黃泥水強勁, 所以放棄晒做所有preparation, 諗住留番今朝先算。

點知今朝d水依然微黃......無辦法! 叫pizza算啦! 我地係屋企hea完一輪之後, 決定出花園街繼續辦年貨......好迫呀! 好有新年氣氛! 好想快d到! 我買左兩對cushion套, 大紅大金黎應節!

講到呢道, 我突然感歎我的大假仲有兩日就放完, 但係好似仲有好多野未做妥, 真係唔想返工, 無奈! (我係唔會port sick既!)

返到屋企, 當然繼續煲原本要煲既湯啦! 真係好正呀! 好味! 可憐既係阿ball好恨飲, 但係因為各種因素, 今日做唔到, 下次我再煲過比你地飲, 應承你地!

仲有, 相片位置:
http://hk.pg.photos.yahoo.com/ph/littlesunn2006/my_photos

係錢生既努力下, 我地有一張好清楚既合照啦!

少女希的笑話

今朝同係花旗國既少女希講電話, 不知不覺, 佢已經十二歲啦! 之不過, 佢d喜好同廣東話就真係笑爆嘴!

佢原來好鍾意睇香港電視劇, 乜汁都撈埋。最鍾意睇"大唐雙龍傳", 唔睇唔得個隻。我唔係好明, 於是問佢點解。........"好好睇, 唔唱k好靚仔, 所以好睇!"
最大願望係今年八月返香港去狄士尼....."你陪我搭過山車, 仲有摩天輪, 轉轉杯, 同撞撞車......"

我剩係掛住笑佢好里直氣壯話唔唱k好靚仔, 同佢講:「我唔搭得過山車, 乜有摩天輪既咩? 仲有, choi, 我唔撞車個喎!」
希:「媽咪, 撞撞車點講.....」
蟹貞係電話後終於搭爹:「傻婆, 係碰碰車呀!」
希:「我可以住係你度, 我食豆豉鯪魚得架啦, 我唔驚孔雀石綠。」
我:「我唔食豆豉鯪魚喎!」
希:「唔緊要, 我有一罐, 我帶埋過黎!」
************************************
希:「擒日呢度開左間宜家, 我地喳車去到比人老粒左。」
我:「你講乜x野呀?」(我個心已經笑到x左出黎, 因為我唔知佢up乜)
我只係聽到蟹貞係後面笑到格格聲, 佢估到我唔知少女希up乜春! 一輪解話之後, 原來係太多人湧去, 已經唔比人再入去, 所以"老粒"左!
我講返"老粒"既意思比佢知, 好聰明, 即刻活學活用舉一反三:「咁即係媽咪擒晚老粒左我洗碗。」
************************************
蟹貞形容少女希依家既樣比我聽......大慨五尺二, 好瘦, 好似蒙嘉慧咁, 仲要陀背兼飛機場.....佢仲成日問點解d埃賽俄比亞飢民點解咁既樣......蟹貞答佢:「你曬黑左同佢地一樣架炸, 仲笑!」

Ballball的瘡瘡, 我們的節目

Ballball生左一粒瘡瘡, 詳情請收睇http://www.cxballball.blogspot.com/。

Ball咁夜仲寫左呢個故事, 搞到我唔寫都唔得。
既然大家都唔洗返工, 咪出黎hea下羅! 我簡左去阿Ball既蒲點 - APM, 因為我未去過。我諗唔到觀塘都有個咁大既mall, 有Dsurprise!

我地無聊到去左supermarket買野, 我仲順手辦埋年貨添!
最老土係阿Ball竟然叫我不如係走之前係APM映返張相做紀念, 又可以擺係個blog度。咁鬼娘都比你諗到, 我更係唔做啦! 仲話我地已經變左老野, 雖然有d係事實, 但係我都要做一個好潮既老野!

看更的用途, 打包的原因

看更的用途, 大家都知, 唔洗講!

打包的原因, "打包", 即係係飛機上面tart野返屋企, 對我地呢講, 係公開既秘密。無人會過問, 亦無人想知, 總之就"寧比人知, 莫比人見"。"打包"既item, 因人而異。但係我聽得最多既自完其說就係擰比樓下個看更! 陰公, 連長途機d垃圾snack, 如掟死狗餅乾等, 都話擰比個看更, 要益佢。我就覺得看更多左一個功能......食死貓!

其他攪笑既"打包"物件同解釋:
芝士 - 餵狗
檸檬 - 比工人洗野
健力仕tissue box - 紙質好, 無公司logo
台灣奶 - 好飲
澳洲奶 - 唔會痾
日本野 - 乜都好過人 (我話既)
茶包 - 屋企無
代糖/糖 - 因為囉左茶包
辣椒醬 - 擰定去outport用
廁所toiletries - 1.唔記得帶 2.好用 3.名牌

餈飯, 我好驚!

放大假前去左3次台北, 亦憶起左我想寫呢個好耐既topic!

我麻麻地鍾意食餈飯, 間唔中食下會好好味。唔知點解, 我公司d靚女做親d野都係一窩"瘋", 講句衰d.....係不知所謂。如有得罪之處, 請原諒!

Layover間酒店門口有一檔賣餈飯, 由於我地每次都係好早就走, 所以通常都會買黎做早餐。早餐, 我自己覺得, 就算點好食, 最多咪一舊起, 兩舊止。但係好奇怪既係, d女有時買十舊八舊, 係有d誇張, 不過人地屋企同朋友多阿! 我自己就完全唔想晨早流流隊舊飯啦!

我最頂唔順既係有d阿姐, 一早吩咐定d靚去買N咁多舊，奉旨咁! 不過, 最討厭個d係自己又懶起身, 又落得黎遲, 仲要扮無知加N咁多request既八婆同機頭，猛問乜野里架......自己就走去人地檔攤, 一舊要紫米加蛋, 另一舊又要條脆既油炸鬼, 多d肉鬆........又話熱豆漿太熱, 凍豆漿又太早, 唔適宜飲.........etc.....跟住就猛催人係咪整緊比佢, 大佬, 比d時間人整呀!

擾攘完一倫, 過晒鐘, 大搖大擺上車, 當乜事都無發生過, 仲要自完其說點解要買咁多:「我買比屋企個賓妹同樓下個看更之嗎!」

乜賓妹鍾意食餈飯架咩! 看更唔係自己帶飯架咩! 樣衰!

豬扒, out啦!

一次唔覺意之下, 發明既新名詞!

上月去羅馬幫允允買手袋個時, 一時情急之下發明既.....「聚脂」!
原因係, 去過羅馬既都知, 條shopping街係越行入去越窄, 亦因為好多人係我前面阻我去路, 又大份, 想閃都閃唔到。一時激氣, 心想鬧佢地係豬扒, 點知自己把口up左:「正聚脂!」

呢個故事, 我自己都覺得幾好笑, 所以話左比PSM, 允允同朱夢琴聽!

P.S. 朱夢琴同學....你係扒界既一姐地位係冇動搖過架, 唔洗擔心! 呢樣野, 你絕對要有信心, 無人可代替你地位......最多都係升格變綠魔! (多得PSM提返呢件趣事)

ipod nano

買左啦! 黑色2gig!

原本想買4gig, 但係諗清楚之後, 都係用唔晒, 慳返d過年.....或者買其他野....
攪完一輪之後, 入好D歌, 真係好型仔, 又好輕, 不個d音色就真係有d保留。

放大假, 感覺很好!

放大假, 感覺很好!

冇乜野特定要做! 好舒服, 雖然患上傷風。希望係呢幾日可以執下間屋, 迎接新年!
希望d friends及各靚女們唔好一打黎就:「做乜放假唔話比我知! 做乜唔去旅行?」

其實「透」下都幾好呀, 平時都無乜幾可......最好係訓到自然醒, 好正!

Happy New Year!

祝大家新年快樂, 身體健康!