안녕하세요的第一堂

星期六, 上左第一堂人參話, 牙窖都"耿"埋!

四個鐘不停咁讀發音, 即係D vowels(子音), 雖然只係aeiou, 但係我感到好頭痛啦! 靜係個O音, 已經有幾個寫法, 加埋個U....., E+O又係另一個O, 救命! 我好彩, 自己有備課, 有好多同學都完全唔知發生咩野事。再讀埋D consonants (毋音), 開始併埋D字, 我對眼開始出煙.......

Miss話上一班有廿四人, 上左幾堂之後, 走左十八個, 佢希望我地唔好咁快放棄, 因為我地d學費唔平, 叫我地唔好side錢。

我希望我可以支持到, 實在係準備過程落左好多心機!

E.N.T.

繼續講下ENT。

唔知幾時開始, ENT同麻煩好似劃上左等號! 生活中有好多機會去ENT人或者比人ENT。係工作上, 叫應酬。係私人時間, 叫做攝罅。基本上, 我唔係好抗拒, 可能以前份工經常都有呢D情形出現, 至於私人時間, 我都唔介意比人"攝", 係朋友先至會有呢個function嗟, 呢D野...家家有求!

但係我係絕對好介意同討厭一D人, 唔單只唔珍惜自己同其他人既時間之外, 仲要大話連篇老作一D歪理去擾亂視聽, 做一D似是而非既小動作去搏取其他人心軟及同情, 加埋唔分"庄閒", 無大無細, 恃熟賣熟。簡單D講, 即係"耍"! 狼來了, 已經唔興啦!

我好慶幸自己都尚算清醒, 呢D雕蟲小技絕對走唔出我法眼! 打擊呢D人我一定唔會手軟!

有病就去睇醫生同食藥!

(P.S. 阿Ball, 同意嗎?)

放大假のPLAN!

仲有幾日就放大假! 一個原則......慳! 不過睇下點.......例如有無外來因素等.....

今年應該唔會去旅行, 因為之前用得太多錢。Dum完野之後, 又買返一搾, 包括衣服, 鞋, 眼鏡, 書, 漫畫, 又報名讀人參話, 所以已經先洗左好多未來錢。

希望可以多d時間做下運動, 好耐無做過d咁健康既野! 仲有搵一日, 可以唔出街係屋企hea, relax下, enjoy my life! 實在好耐未試過係屋企可以無憂無慮咁hea, 好期待, 一日都夠!

Last but not least, 可以暫時離開一D唔想E.N.T.(entertain)既無聊人同事! 正!

書展的啟示

講返之前個書展, 迫餐死! 我只係買左本金田一同觀賞魚圖鑑賞&養殖小百科。

唔使理個subject, 只係gimmick! 自從睇過海底奇兵, 我就想養呢D海水魚好耐啦! 只不過, 聽講, 打理方法有D麻煩, 但係就越睇越鍾意, 尤奇係入面D主角, 好似小丑魚nemo, 所以近日我將研究人參話既時間分左好多出黎睇呢本書。裏面D圖片好靚, 仲有介紹邊D魚易養。

去睇書展前, 同PSM去左食板前壽司, 好好味! 餐廳入面都有一缸好大既海水魚, 原來養埋清潔蝦同寄居蟹都得!

基本既條件, 我都有D眉目, 依家返而係諗下個魚缸應該擺係邊, 遲D放大假可以慢慢搞!

巧合的意外

由月頭開始, 一路都好忙, 係好忙, 完全冇用錯字眼!

頭一星期都係飛shopping機, 再患上感冒, 加上受人所托要去買D野, 所以係倫敦既時間, 我第一次覺得自己搵自己條命"較飛"。由喉嚨痛到發燒, 發冷, 發熱, 標晒大汗, 到食到冇晒藥, 跟住咳, 係一日裏面發生。第二日, 無計, 點都要出去買藥, 所以冒住生命危險, 都要出去, 順便幫Hazel買佢既心頭好! 亦可能因為咁樣頻撲法, 反而覺得精神D。到走果日, 終於聲都盟埋!

第二星期, 去左首爾同星加坡。由於我兩間新酒店都未住過, 所以繼續流住鼻水周圍去!

返香港之後, 先諗下點解我仲流緊鼻水, 於是再睇醫生, 先發現我係鼻敏感。我真係病到懵左, 醫生問我要唔要假, 我竟然答唔洗! 其實到左呢個階段, 我已經係病入膏肓, 個人係"支力"到乜都唔識反應。

到前日差唔多好返, 我隻腳猙又無端端發炎, 真係吹脹!

忙繼續唔放過我, 擒日去埋迫書展! 今日先得閒去買腳痛藥!

咁究竟巧合D乜? 仲未講到......

其實我呢段日子以來都唔知"飛"錯線, 我將我條線飛左去"未能接通"模式! 直至阿Ball有一日搵到我話比我知。於是, 就係咁, 過左半個月無voicemail, 無銀行騷擾hardsell佢地D產品, 無晒D無聊電話錄音junk call......, 避免晒D "entertained call", 返而可以比我多D時間休養。

真係錯有錯著!

遲來的金田一

終於出場啦! 上面既全部都係日本版, 我忍唔住要先睹為快!

金田一係香港復活啦! "吸血鬼傳說殺人事件"已經係05年既作品, 唔知點解今年先有中譯本, 奇怪係台灣無出。至於"歌劇院第三次殺人事件", 係日本三月既作品, 分上下集, 估唔到, 上集可以咁快出到中譯本。

預告下期係叫"獄門塾殺人事件", 依家係日本既"週刊少年"連載刊登!

開學事件一二三.......

開學在即! 前日終於收到中大校外課程既通知同學生証, 七月尾開始上堂學人參話啦!

事前做左好多準備功夫, 包括研究時間表, 搵資料睇下我會唔會了解佢D鬼畫符, 填左一份好side時間填既報名表, 等reply, 最麻煩既莫過於搵韓語字典, 亦係我估唔到一件咁困難既事!

大大話話, 韓風係香港已經吹左幾年, 但我絕對估唔到韓語字典仍然係起步階段。就算一D好大既書局, 都只係得兩本, 一本係大陸出, 簡體字(HK$65), 一本係台灣出既, 繁體字(HK$300)。書局職員表示呢D字典既貨源唔多, 而且來貨時間唔穩定。由於當時我仲未知收唔收我, 所以唔買住, 留番去台灣睇下點!

去到台灣, 有D意外。行左幾間書局, 先發覺我既諗法有D唔arm。一路都以為台灣書局乜書都有, 但係我今次真係有D失預算, 五間書局當中, 只有一間有, 就係香港搵到果本! 問返D職員, 佢話佢地好興"語言學習書", 但係字典就幾乎"零"。衡量價錢後, 橫掂都係學, 同埋同一本字典, 呢度只係要港幣200, 比香港平100蚊, 所以即刻扑錘買左先。返酒店後, 先發覺呢本字典都係今年一月先出既!

另外, 當然唔少得買下公仔書, 我今次買左10冊"死亡筆記簿", 呢套漫畫已經拍成電影, 係日本既票放已經超越舊年既Nana, 所以我想先睹為快。仲有同事介紹既"海賊王", 我買左兩本劇場版, 再買左一本小說"天使與魔鬼", 真係有排都睇唔晒!

講返正題, 我之後應該點安排自己返工呢? 做高鐘仔, 定係apply office D臨時工好呢?

係呢, 我D讀者點解唔見晒既? PSM, 阿允, 昆哥.....etc, 你地去左邊呀!

阿允, 唔好意思, 我真係唔記得左你上星期生日, 補祝你生日快樂, 健健康康, 仲有成日都咁靚女!

為何變了高鐘妹?

阿ball, 黎唔切問你點解突然變左高鐘妹既? 出更表果陣都未係過喎!

冇里搭圾之家人篇

應該開一專欄寫"冇里搭圾事件簿"!

冇里搭圾呢樣野, 人人都會或多或少做過, 包括我自己在內。但係到最後, 都應該為自己既唔嗲唔吊負返D責任, 唔好不了了之。唔知點解, 呢D咁無奈既野, 硬係要成日係道chit chat咁轉, 係咪樣樣野都要人三催四請, 先至覺得矜貴呢?

事情既始末唔交代啦, 因為實再太長同太loh啦! 我屋企人都會聽我呻過呢樣野, 點都好啦, 我唔會再做醜人架啦!

鄉音! 又一新作!

前幾日去美X食下午茶餐發生既事件!

由於只係口渴, 又想歎下冷氣, 所以叫左一個食完都唔飽既豬皮魚蛋下午茶餐。埋到counter, 出餐員阿姐先同我講冇晒魚蛋, 問我食其他野好唔好。是但啦, 我都唔肚餓。

我:「咁有乜野呀?」
姐:「有雪條, 雞翼同燒賣。」
我:「是但啦!」(我仲未意會到點解下午茶會食雪條........)

阿姐於是囉碟出黎, 夾左一柞薯條。我get到啦, 係薯條, 唔係雪條。由於我不大鍾意食薯條, 所以叫阿姐比過其他野。我見佢夾左隻雞翼, 心諗, 跟住一定係燒賣, 都好呀, 好耐無食過, 難得有D咁既combination。

奇怪在，咦? 點解燒賣係"一碌野"既? 睇真D, 係一碌粟米, 我再問清楚:「乜唔係燒賣咩?」阿姐夾住枝粟米答我:「咪係燒賣囉!」

唔知呢位阿姐邊戍鄉下架呢! 點解可以讀到呢D音架呢?

發生呢單野之後, 我第一個諗起既人係阿ball, 我一定要話比你知.......哈哈!

安娜的禮物

"郵箱裡放著一張提取包裹的通知卡"..........

我等緊既係韓文課程既確認收生通知同學生証! 我以為係, 今日終於有時間去郵局囉啦!

拎到我面前既原來係安娜寄黎既禮物.....我愛搜集既木公仔!